好多有養寵物嘅朋友都會患上「肉球不滿症」，一年365日每日24小時都想捽住屋企隻BB腳板底同手仔戈幾粒肉肉，好似上咗癮咁。好彩今年係狗年，好多品牌都推出同狗狗有關嘅產品，一眾「肉球不滿症」患者都可以搵到新嘅治療方法啦！

B. by Banila 哥基肉球化妝掃

泰妍做代言人嘅韓國彩妝品牌Banila co. 旗下副線B. by Banila最近推出咗哥基犬腳仔肉球化妝掃！淺啡到棕色掃毛十足肥哥基嘅毛色，見到就諗起哥基又肥大又軟腍腍嘅腳仔，成個感覺好治癒呀～

既然設計靈感來自狗狗嘅肉球，質素、製作當然都唔可以馬虎，令用家幻想破滅啦！掃毛質地非常幼細軟滑，用嚟搽姻脂或者直接當粉底掃化底妝都唔會刮面，凹凸掃頭仲可以打造到腮紅深淺漸變效果～

掃頭直徑闊40mm，高這23.5mm，刷毛蓬鬆，可以做到非常均勻效果。

唔止係乾嘅粉類彩妝用品，呢款化妝掃連濕粉都可以上到，粉底液同姻脂水都可以用呢個肉球上妝。將適當嘅份量先搽喺化妝掃，再用佢嚟上面就會容易控制好多啦～

得一種Size，一支大號化妝掃，總係好似美中不足，唔係好夠用喎！其實哥基犬化妝掃系列仲有一支細號㗎！呢支細號掃靈感源自哥基短小嘅尾巴，望真啲又真係幾似！

小號嘅哥基尾化妝掃就適合用嚟做眼影、鼻影或者髮際線填滿。

B. by Banila 哥基肉球化妝掃售價係10000韓圓，大約$70港元；細號哥甚尾巴化妝掃就6000韓圓，$40港紙。Gmarket同香港代購網都有售，各位肉球控記住入手啦～

官方網頁：http://www.banilaco.com/product/productView.do?c_pm_seq=111394