黃子華棟篤笑2018正式命名為「金盤𠺘口」，聽到Show名大家都有好多惴測，而子華都喺3月25日自己Facebook專頁證實自己將會「收咪」，完結由1990年開始嘅棟篤笑生涯，結果喺第一日預售嘅時候，就出事喇⋯⋯
話說上次2014年子華神喺紅館開11場嘅時候已經一票難求，今次仲話係「收咪」Show，買到飛嘅機率分分鐘同中六合彩有得揮，結果琴日DBS Omni會員優先預售時就出大事喇，無論係預售網址定電話，直到當日下午4點，無一樣係可以成功接通。最嬲嘅係網上出現好多聲稱係「內部渠道」到手嘅門票，以正常票價高7倍出售。黃牛可恥呀！
子華神怒責黃牛
琴日好多人搶唔到飛，網上出現好多傳言，正當大家都好憤怒嘅時候，神就出現啦！子華喺Facebook上載兩條片長分別係5分半同2分半鐘嘅短片回應。
其實早喺預售之前，已經見過有黃牛飛網站出售棟篤笑門票，話係透過「內部渠道」攞飛。子華嚴正聲明基本上連自己背後有份努力嘅團隊都冇人有飛，最慘嘅係佢地被部份無知網民冤枉，話佢地「又食又拎」，搞到幕後支援班底爆喊，成件事真係好委屈！
《黃子華棟篤笑2018》講到明唔巡迴，就係因為覺得個Show要為香港人而設，所有嘢要貼地，想將全部準備時間擺哂喺香港嘅場次，咁用心用力竟然換嚟咁嘅言論，今次真係「佛都有火」！
「我比任何人都覺得嬲，因為每一個表演者花咗咁多精神時間去準備呢一樣嘢，大家都好辛苦去準備一個表演，然後就係一啲完全唔需要付出嘅人，去賣1倍、2倍、34567倍嘅價錢，然後一啲好長期支持你嘅fans要去承受呢啲價錢，我一路都好接受世界係唔完美，但咁係太過不完美，太過離譜！」
神當然唔會淨係為自己發聲，前排久石讓音樂會飛、甚至係每次受歡迎嘅演唱會門票一樣係比黃牛炒高幾倍，普通一個民娛活動要搞到咁，子華就要求政府要做嘢，打擊呢種對大眾嘅剝削，亦都呼籲市民千！祈！唔！好！買！黃！牛！寧願座位吉哂都唔想大家以不合理價錢入場。
加開兩場 摶到盡為求人人有份
第二段片段子華就提到加場問題，原本有兩日係用作休息或者突發事件等嘅後備場，為咗更加多人有得睇，而家決定全部推哂出嚟，公開買飛做埋佢！而子華亦都清楚講明3月26-30日期間嘅係預售門票，買唔到嘅朋友可以喺4月24日城市電腦售票網正式公開發售時買飛，每人限買4張，我地未輸㗎，仲有機會可以睇到㗎！YEAH！
子華今次真係搏得好盡，一場Show要成3個鐘，之前話連開17場，聽到都已經覺得Chur，發生呢種事情，子華身體力行為大家著想！開Show近廿場，「牙力」同體力少啲都頂唔住。片中都有提及自己有擔心過加場後門票反而會濟銷，不過神真係神，佢話唔緊要嘅，最緊要真心想睇嘅觀眾有得睇，大家唔好助長黃牛就夠啦！
2014年之後，子華就再無開過棟篤笑Show，當時佢講過：「我諗好多嘢都已經笑唔出」。今次又只係做香港場，內容肯定拳拳到肉，睇得出子華神好愛香港，好錫香港人。黃牛們都係放下屠刀，唔好再劏香港嘅真心觀眾，立地成佛啦～
順帶一提，為咗平息恕氣，黃子華官方YouTube頻道已經上載咗歷年嚟大部份棟篤笑，仲有擇錄低嘅精選片段，大家可以上去溫溫書先：
https://www.youtube.com/channel/UCMjf4Ii0sv2wEqaNmYA85qg
