《花樣男子》完結篇之後，道明寺同衫菜就過住幸福快樂嘅生活。佢地嘅故事告一段落之後，TBS相隔10年搵嚟佢嘅續作搬上電視，《花後天晴》喺4月17日晚上10點首播，期間日本Twitter出現大塞車死機情況，原因竟然唔太關今季嘅主角事，元兇係松本潤飾演道明寺？
2005年開播嘅《花樣男子》由第一、二季去到電影完結篇，無論係卡士定口碑都係咁多個重製版之中最無敵！F4成員由松本潤、小栗旬、松田翔太同阿部力飾演，女主角衫菜就係當年只得18歲嘅井上真央擔正，全個陣容顏值都無可挑剔，仲造就到松本潤同井上真央呢對緋聞傳足十幾年嘅「螢幕情侶」，到今時今日仍然係傳媒熱話。天團 嵐亦都係由當時嘅《花男》紅到而家，可想而知呢套劇有幾大殺傷力！
當年嘅選角質素同原作嘅吻合度一樣係世界級，道明寺嘅媽媽由加賀麻里子飾演，淨係個氣勢已經夠嚇疾人；道明寺家姐就由松嶋菜菜子飾演，一代日劇收視女王肯定唔會有錯； 連友情客串嘅集數都係搵嚟戶田惠梨香、貫地谷栞等一線女星，你話點捨得唔追！
前作咁高質，TBS就諗住用返之前嘅策略，利用劇集捧紅一班新人。故事繼續以貴族學校 英德學園作為背景，原本出身富貴嘅女主角江戶川音因為屋企破產，被迫要喺英德隱藏自己身世繼續扮有錢。時間剛好去到F4畢業10週年，神樂木晴就決定仿效自己崇拜嘅道明寺，成立新嘅惡霸組織C5。而必備嘅三角戀令一邊就係就讀英德死對頭學校——桃乃學園嘅學生會會長馳天馬，同江戶川音有婚約。
故事大綱係偶像劇範本，不過好可惜只係出咗預告，已經唔被外界睇好，原因之一係飾演女主角江戶川音嘅演員杉咲花外貌不夠討好，其他演員顏值亦同前作相差好遠，令到播出前期待度偏低。
為咗令到劇集唔會輸喺起跑線上，劇組就搵到第一代道明寺——松本潤嚟客串首集，消息一出已經喺網上瘋傳，連海外Fans都為咗佢地嘅「初戀」道明寺，喺首播當晚用盡方法睇直播。道明寺登場嘅一刻，除咗尖叫之外，所有人都瘋狂Cap圖！
道明寺只係出現喺男主角嘅回憶片段裡面，大半鏡頭都只係得背影，但聽聲又確實係松本潤本人，最Close Up 清楚嘅可以話係呢一幕！無錯！係道明寺呀！
就喺呢一刻，個Twitter要爆喇⋯⋯播出期間Twitter文章第一至第五位全部都係道明寺，而且仲不時出現Over Capacity嘅畫面，文章、影片、定係圖，全部被瘋傳，個個好入戲大叫：「踢走庶民！」搞到網絡大塞車呀！！
道明寺癱瘓咗一個平台，而《花男》系列嘅威力就擴展到其他搜尋網絡！日本Yahoo話題榜第一至十位全部都係同系列有關嘅搜尋字眼，10年後嘅春天，《花男》威力仍然可以反轉全個日本！
原祖級道明寺雖然救到話題性，不過就未成功救到《花後天晴》嘅收視。有松本潤坐陣嘅首播都只係得7.4%收視，創下TBS火10開檔4年嚟第二低嘅首播收視，估計之後會持續下跌。大家要繼續期待吓劇情方面會唔會再有驚喜喇！
