各大化妝品品牌而家已經開始陸續公布2018年春季系列產品，Lancôme亦都唔例外。今年Lancôme就以法式糕點為主題，推出「French Temptation」系列化妝品，包括馬卡龍腮紅、十色眼影盤、染唇液、腮紅高光二合一氣墊、眼影筆及指甲油，由包裝到顏色都非常少女，真係可愛到想咬一啖！
Sweet Macaroon Blush & Blender 腮紅及粉撲組
以經典法式點心馬卡龍作為設計，Sweet Macaroon Blush & Blender共有粉紅及珊瑚兩種腮紅色號選擇，附上專用白色粉撲，就好似夾住忌廉夾心嘅馬卡龍咁，絕對會係今個春天你個化妝袋入面最甜單品。
Eye Sugar Palette 十色眼影盤
如百花奼紫嫣紅，又如糖果五彩繽紛，春天不妨跳出眼影comfort zone，親自試一試Eye Sugar Palette嘅甜蜜眼妝有幾甜。十種顯色度極高嘅細緻眼影，加上配色可愛嘅眼影掃，化妝原來可以咁好玩！
Jelly Flower Lip Tint 染唇液
冇人可以抗拒得到擺咗花入去嘅化妝品，因為真係太可愛啦！加入花瓣嘅Jelly Flower Lip Tint唔止睇落靚，仲會為你雙唇染上自然健康嘅柔嫩色彩，配合全系列化妝品色調，令你喺生機勃勃嘅春天繼續明媚照人。除此之外，Lancôme L’Absolu Rouge唇膏亦會推出全新限定四色，比你更多選擇。
Light Cream Duo Cushion 腮紅高光二合一氣墊
調整膚色對於整體妝容效果非常重要，如果可以一盒氣墊負責多種功能，就真係可以幫化妝袋空出唔少位，擺多枝唇膏都好吖～Light Cream Duo Cushion就推出兩個色號，Juicy Berry & Bright Peach係腮紅加調色，Refreshing Pistachio & Pinky Peach係高光加調色，輕鬆完成妝容。春季限定包裝氣墊粉底亦會同時發售，規格同Lancôme平時嘅氣墊粉底一樣，可以幫你手上嘅產品換上新裝。
Ombre Hypnôse Mini Chubby 迷你眼影筆
Ombre Hypnôse眼影今次縮小登場，細細枝方便攜帶，creamy質地令你上妝不費吹灰之力，亦可同粉狀眼影重疊使用，變出亮麗色彩。
Le Vernis 限定四色指甲油
最後當然唔少得Lancôme Le Vernis指甲油新色，三款底色延續春季系列粉嫩少女風格，閃爍白色同樣動人，十指指尖一樣要咁精緻，先係最可愛嘅女人。
2018年想做馬卡龍系甜美女孩，Lancôme French Temptation絕對係必入化妝品！仲有其他品牌嘅新品推介，繼續留意Eilly為你帶來新消息啦～
