又黎到四年一屆既世界盃足球盛事啦！除了一眾球迷萬眾期待之外，平時對足球沒咩性趣既大眾都會湊下熱鬧，一齊捱夜捧場。不過淨係對住部電視見到D人跑黎跑去，女生們係咪都唔係好睇得明呢？唔熟悉足球唔要緊，今日小編整理左個懶人包，包保你睇完同男朋友、心儀對象同專業球迷搭到嗲！

【世界盃簡介】

2018年係第21屆國際足總世界盃，舉辦國係俄羅斯，主辦會場大部分都係俄羅斯歐洲地區內既城市，而冠軍戰預計會係莫斯科盧日尼基體育場舉行。賽事由2018年6月14日至7月15日舉行。6月14日開始係分組賽、之後6月30日為16強賽、7月6日半準決賽，7月10日準決賽，7月14日季軍戰，7月15日總決賽。

【重點球星】

呢一Part真係好重要～如果唔係一地講邊個你都唔識！(不過女仔主要都係睇靚仔) 

C朗 – 葡萄牙國家隊

效力皇家馬德里，2008年度當選世界足球先生及總共22項榮譽，是球壇史無前例的大滿貫。緊隨美斯，成為第二個五奪世界足球先生的足球員，最近亦成功第5次奪得歐聯冠軍。

美斯 – 阿根廷國家隊

效力巴塞隆拿，2009年至2012年連續四屆贏得世界足球先生，亦是首個五奪世界足球先生的足球員。是阿根廷歷史射手榜第一名。

安祖施華 – 葡萄牙國家隊

同樣是球壇新星，效力AC米蘭，獲C朗拿度力讚的他於去年夏天以3,800萬歐元轉會費從波圖轉投AC米蘭，只有22歲的他已為國家隊出場21次及攻入12球。

尼馬 – 巴西國家隊

效力巴黎聖日耳門，2017年以2.22億歐元由巴塞隆拿轉會至巴黎聖日耳門，轉會費打破世界紀錄，現成為全球最高身價球員。自從2月25日負傷後還沒百分之百痊癒，狀態成疑。

夏薩特 – 比利時國家隊

效力車路士，父母都是前比利時職業足球員，今次與杜根夏薩特兩兄弟一同入選國家隊。夏薩特以凌厲的速度和進攻能力聞名，實力備受高度評價。

【足球賽術語】

• 插水︰形容球員假裝被對手摔倒，扮作受傷搏取罰球
• 開汽水︰觀眾噓聲
• 牛油手︰形容龍門經常手滑，接不到球
• 痾蛋︰同樣形容龍門手滑，令足球從胯下漏入網
• 大細龍︰龍門兩腳之間為「細龍」，龍門為「大龍」
• 梅開二度︰同一球員在同一球賽內攻入2球
• 帽子戲法︰同一球員在同一球賽內攻入3球
• 大四喜︰同一球員在同一球賽內攻入4球
• 通坑渠︰形容帶波時，足球穿過對方球員兩腳之間
• 宴客︰12碼但未能入球，等同向對手送大禮
• 神經刀︰球員狀態飄忽，表現時好時壞
• 老鼠拉龜︰形容一隊球隊久攻不下，長期處於拉鋸狀態，無從入手
• 泊大巴︰球隊放棄進攻，加強防守而將全隊球員集中在己方禁區內，讓對方無法闖入禁區射門，人數之多猶如將一架巴士泊在龍門前
• 三閘線︰將球場平分為三分，約略所得出的界線。評述員多用三閘線來形容龍門開死球到前場時，死球所落的位置，即離龍門28-30碼外一帶

【足球賽規則】

睇波緊係要知規舉啦！以下係一D球賽規則等你地明白發生緊咩事！

• 越位︰當進攻的球員把球傳往前場的隊友時，而該名球員比起防守的球員更接近底線
• 12碼︰防守球員在己方禁區內犯規，就會被判罰十二碼
• 罰球︰除了12碼，只要球員在場內犯規就會被判罰罰球
• 界外球︰球員將足球踢出邊線外，就會被判罰界外球
• 角球︰當守方球員把球踢出自己的底線，攻方的球員便可獲得角球
• 球員數目︰每隊11名正選球員﹙包括龍門﹚和11名後備
• 時間限制︰上、下半場各45分鐘，中場休息15分鐘。補時則由球證決定，多數下半場補時3-5分鐘。16強賽起若打和便要進行上、下半場各15分鐘的加時賽；若然加時賽都未能分出勝負，就要以12碼來分勝負
• 換球員︰每隊在比賽中可換3名球員，但被換出的球員不可再次入場比賽
• 黃牌紅牌︰兩面黃牌會變紅牌，球員會被罰即時離場，並且於下一場賽事亦不能出場作賽

Source：viutv
#世界盃2018
#worldcup