講到日本手信，點心一定走唔甩，但係最受歡迎嘅點心又係邊一款？2017年版「東京車站人氣手信排行榜」列出十大最歡迎手信點心，下次去日本唔知買咩好嘅話，就參考一下呢個排行榜啦！

第十位：L’ ATELIER DU SUCRE肉球瑪德蓮蛋糕

傳統瑪德蓮蛋糕變出新意，粉紅色貓貓肉球真係魅力沒法擋！身邊有貓奴朋友嘅話，送呢樣就最啱喇～

第九位：和蘭西葡Tokyo Shukurin Marron栗子點心

集合和（日本）蘭（荷蘭）西（西班牙）葡（葡萄牙）四國風格於一身，和蘭西葡以混合日式與西式點心、創造出全新風味而聞名，可可味泡芙注入栗子泥內餡，甜度恰到好處，喺第二度買唔到架～

第八位：Sucrey Francais Best Selection雜錦口味禮盒

西式點心品牌Francais為你帶來成個排行榜入面包含最多款口味嘅什錦禮盒，包括橫濱貓舌餅、四款口味嘅法式千層酥同埋檸檬蛋糕，鍾意水果口味點心嘅話絕對唔可以錯過！

第七位：YOKU MOKU Saku Saku Carameling 脆皮焦糖冬甩

香脆焦糖冬甩夾住幼滑吉士忌廉醬，加上粒粒果仁點綴，係人氣手信店YOKU MOKU嘅首選產品！細細份焦糖冬甩夠可愛，食落又唔會太滯，送比女仔就最適合啦～

第六位：DOMON de BAUM Baum Bar年輪蛋糕條

將年輪蛋糕切成小塊，加上頂層條紋朱古力coating，成班人一齊分享嗰陣唔使再煩要將一個蛋糕切做幾多份，一人一條啱啱好。

第五位：Arinco Roll Salt Caramel Roll焦糖鹽蛋糕卷

軟綿綿嘅海綿忌廉蛋糕包喺焦糖鹽脆皮入面，兩種截然不同嘅口感同風味完美融合，只此一家絕無僅有！不過冇密封包裝嘅蛋糕都係返到香港幾日內就要食完，保存上要多多留意。

第四位：Tokyo Rusk Collection小麵包雜錦禮盒

Rusk呢種麵包通常都係鹹食，不過Tokyo Rusk就將佢變成甜食，仲有幾種唔同口味！呢款雜錦禮盒就包含咗杏仁、牛奶、宇治抹茶同埋紅莓四種味道，一盒手信真係可以有多重驚喜架～

第三位：Tokyo Caramel Wafers Bar焦糖威化餅

一盒包含牛奶「Milk Caramel」同埋咖啡「Bitter Caramel」兩種口味，七層威化夾心疊起層層口感，唔鍾意食甜品嘅朋友都可以享受Tokyo Caramel Wafers Bar香脆滋味。

第二位：資生堂Parlour Tokyo La Boule朱古力

資生堂唔止化妝品出名，專做甜品嘅資生堂Parlour亦係廣為人知，呢款成田機場及東京車站限定嘅La Boule朱古力，香脆曲奇裹上朱古力以及可可脆片，朱古力愛好者一定食到停唔到口！

第一位：東京芭奈奈×KitKat紀念版香蕉夾心朱古力

今年11月先正式推出嘅香蕉夾心巧克力，發售一星期熱賣超過35萬盒，2017年人氣手信第一名可以話係實至名歸！東京芭奈奈經典香蕉夾心，包喺KitKat朱古力條入面，你而家明點解推出一個月就奪得排行榜冠軍寶座啦，有冇人可以幫小編買一盒啊～😭