2018繼續係「誇世代」嘅天下，今年會繼續流行需要漂染、玩味濃嘅髮色，前幾年興玩漸變、或者係Neon，成個頭要上有2-4種Colour，飽和度較高，超級Wild呀！
用色實淨，比較Sharp醒搶眼。髮型設計、長短層次，甚至係衣著化妝都要配合得宜先Carry到。而且經漂過嘅頭髮要Keep住Colour夠Full，就需要成日補染，要花好多心機打理呀！
好彩！嚟到2018年，反而流行返漂染後自然褪落嘅髮色，去Salon大搞完自己都可以喺屋企補色，方便打理！
2018年大勢髮色：Opal Hair
Opal Hair，換言之就係以雞蛋石花紋作靈感，灰銀做底，粉系配色，整體粉嫩柔和，唔會有任何一隻顏色過度搶眼。
同Neon Hair最大不同之處，就係Opal追求自然，除咗配色之外，漸層變化，光澤感都非常重要。銀色亮面髮質可以將光線折射，做到好似天然寶石一樣耀眼而不浮俗。
由於喺上色階段已經需要諗定漸變細位，所以Opal Hair可以話係靚到零死角呀！無論係天然直髮定係Set曲，紮起定放長，Opal Har展現到唔同漸層色彩變化，咩造型都好有驚喜！
世上冇唔靚嘅女人，只有懶嘅女人！Opal Hair講求嘅光澤度係需要健康嘅髮質先可以維持到，而且要做到銀白色效果，需要做到高程度漂染，如果冇經驗，成個過程都幾高風險！建議搵返相熟或者有經驗嘅髮型師處理，亦都唔好貪平用不知明產品，因為咁高程度嘅化學過程唔止傷害髮絲，自己做嘅話仲有機會Burn埋頭片，所以一定、一定、一定要搵有經驗嘅髮型師呀！
除咗染嘅過程，事後保養都非常緊要！亞洲人髮色偏紅，褪色後好容易會變黃，要維持返灰銀狀況，建議定期用返紫色去黃專用嘅洗頭水，或者視乎需要用返補色洗頭水。日常護理方面都要用返含蛋白成份、起泡較少嘅洗頭水同護髮素，勤力做Hair Mask，唔止可以俾返足夠營養比頭絲，仲可以令顏色維持更耐！
大家整頭嘅時候可以問返髮型師有咩產品適合自己，咁就可以靚得嚟又保持到頭髮嘅健康成長啦～
