辛勞一週又到星期五，想搵個特別嘅地方同朋友食個飯輕鬆下？如果你特別鍾意港式懷舊風味，不如考慮一下小編今次介紹嘅觀塘樓上cafe「開餐達人」，除咗懷舊主題同放題menu之外，仲可以落手落腳整甜品，真係超開心！

【懷舊主題裝修佈置超有心】

一走入開餐達人，即刻就比裡面嘅懷舊布置吸引，尤其係檯面嘅棋盤，配上格仔枱布同花碌碌筷子，即刻覺得自己好似返咗上個世紀咁，食飯打卡呃like必備！

而家好少見餐廳board game會有棋捉，你仲記唔記得點玩呢？

電流棒又係一樣好耐冇見嘅遊戲，仲有龍虎榜記錄，小編就打破唔到紀錄啦，都係交比你哋啦！

【自製甜品bar，動手製作新鮮體驗】

甜品放題食得多，你試過自己一手整未？喺開餐達人你可以自己整棉花糖、格仔餅、法式班戟、芭菲……整咗咁多款，要有人幫口先食得晒！

倒入砂糖就可以自己整棉花糖，熱辣辣咬落去感覺好滿足啊～

餐廳牆上有晒步驟教你點整，第一次做都好快上手，大人小朋友都可以試架！

用甜品bar嘅材料自己整芭菲，又係一個打卡好選擇

【飲食下午茶/晚餐放題，menu好豐富】

下午茶同晚餐時段都係任食放題，晚餐放題坐足4個半鐘只需每位148蚊，下午茶時段限時3個鐘每位88蚊，包埋甜品bar同飲品，即刻睇下有咩必食之選！

日式鰻魚蛋包飯：經典日式料理組合，真係無得輸

流心三重芝士釀吉列雞扒：芝士星人見到拉絲已經流晒口水，吉列雞扒外脆內軟，每啖都停唔到口～

以近期大熱嘅紫薯做餡嘅紫薯西多士，食落真係好飽肚，少少煉奶甜味啱啱好

日式冷烏冬及一口炸芝士同台式炸豆腐，無論你鍾意邊度嘅美食都可以喺度食到，咁就可以滿足每個人嘅願望啦！

晚市火鍋配料一樣足，Minions芝士丸一定係最受歡迎嗰樣，可以任食真係太好啦～

無論係朋友聚會定係一家大細出遊，今個週末想醫肚之餘玩得開心啲，不如就約埋所有人一齊去開餐達人啦～

【開餐達人餐廳資料】
地址 ：觀塘開源道47號凱源工業大廈1樓B室（港鐵觀塘站 B2 出口步行約5分鐘）
電話：36892496 / 59105085(whatsapp)