日皇明仁次子秋篠宮嘅長女 真子公主同平民出身嘅小室圭喺2017年公開宣佈婚事將近。按照日本《皇室典範》規定，女皇室成員下嫁平民後必需放棄皇族身份。公主去到外面要過返一般主婦生活，加上普通日本家庭唔興請Helper姐姐，對於自小有人服侍嘅公主嚟講，要打理哂一家生活起居絕對唔係易事，所以上年真子公主公開呢頭婚事嘅時候，好多人都認為：係真愛呀！

可惜之前就有傳媒揭露未婚夫小室圭嘅媽媽欠落大筆負債，而且債主就係小室媽媽嘅前男友，無論係錢銀定男女關係上都成為皇室醜聞，當地報章仲好唔客氣咁話呢頭婚事係世紀騙婚，搞到上個月皇室要宣佈將婚禮延期至2020年⋯⋯

不過公主就發表聲明，指自己引起外界惴測同帶嚟騷動感到相當抱歉，二人想要結婚嘅意向都從未改變，只係覺得婚禮安排嘅行程有啲倉促，加上出年明仁天皇退位，皇太子德仁有繼位儀式，所以先選擇2020年呢個時間。

呢個大方回應唔單止悍衛皇室權威，表示自己對外界同皇室成員抱住同樣尊重，而且堅決為自己追求真愛、不動搖嘅意志勇敢發聲，即使唔係愛情方面，佢嘅處事手法都好值得我地學習！

正當大家嘅目光都擺係年輕嘅佳子同真子公主身上嘅時候，有位日本皇室成員同樣為咗真愛捨棄一切，因為行事較低調未有被大幅報導，但佢用咗時間去證明比我地睇無論係咩身份，只要努力，一樣可以憑住努力喺愛情同工作方面獲得其他人嘅認同⋯⋯

清子公主：首位平民出身皇后之女

好多人都覺得叫得做「公主」，佢嘅故事、佢嘅婚姻都一定係童話一樣Fancy。日本至今總共有8位皇女因為下嫁平民而被除去皇籍，大部份嘅結婚對象都係元皇族、地主、大集團當家，婚後生活都不脫離富貴，好多都唔需要外出工作，做吓總裁或者文化協會主席渡日。睇返個List，唯一比較顯眼嘅就係佢：明仁天皇獨生女清子公主。

對比起女性心目中嘅「公主」，清子公主無論係長相、打扮都非常撲實，行事低調。其他顏值高嘅成員細細個就受到國際關注，清子公主喺國內外嘅人氣都較為遜色。

不過身為明仁天皇嘅唯一女兒，而且係三兄妹中排行最細，自小被父母同哥哥錫到燶！有傳單單係去公園玩已經有8個女侍跟住。但係錫還錫，天王同皇后都知道公主會有嫁出去嘅一日，加上清子嘅媽媽美智子係首位平民出身嘅皇后，所以對寶貝女各種基本生活技能同社會處事教育都好嚴格，無論係皇室內外嘅人都稱讚清子公主性格溫和同非常識照顧身邊嘅人，絕對唔係刁蠻公主！

一大學畢業，清子公司就去到哥哥嘅研究所受薪工作，不過冇因為兄妹關係而被優待，一樣要準時返工，由執頭執尾嘅雜務工作做起，最後升格為正式研究員，協助撰寫出版《日本動物大百科》，成為日本第一個去到職場工作有糧出嘅公主。嗱，做公主都一樣要返工㗎！

2005年，公主36歲先下嫁一般公務員黑田慶樹，依照一貫低調作風，婚禮冇係皇宮進行，只係喺酒店邀請150個重要賓客同朋友觀禮，婚禮上都冇交換戒指，冇切結婚蛋糕，之後亦都冇去蜜月旅行。婚後生活，要同一般主婦一樣，喺屋企要打掃洗衫煮飯，日本地方大，出街買餸都再冇司機接送。清子公主特登係婚前考好車牌，希望做個凡事親力親為嘅好老婆。

當年清子公主兩個哥哥都結哂婚，公主30歲都未有著落，有傳日本宮內廳非常擔心，所以幫公主同各家名門安排咗唔少相親，不過最終清子公主都拒絕再發展落去。清子公主嘅丈夫係哥哥自小相識嘅同學，兒時開始就一直有來往，而清子公主就用時間證明咗真愛係值得等待，而家仲會間中自己揸車返娘家採吓家人，生活過得好幸福！

放棄舒適嘅生活圈，為咗忠於自己嘅想法踏前一步，為自己愛嘅人而努力，呢啲就係現代女性值得學習嘅地方。