1月嘅時候，哈利波特首個RPG手機遊戲《Harry Potter: Hogwarts Mystery》（哈利波特：霍格華茲之謎）發行消息公佈，搞到個個日日等住霍格華茲封入學信（係真係會收到入學信㗎！）想知道遊戲時間設定同世界觀、仲有想收到入學信？Click入下面嘅內文重溫返啦！
有傳4月25日就係各位巫師入學嘅大日子，因為消息一度指《Harry Potter: Hogwarts Mystery》會喺呢日登陸各大手機平台！而好多網民都喺早幾個月上載遊戲界面，事關官方喺無任何預警下突然開放台灣Android平台版作公測，雖然只有少數人可以享有呢個福利，不過就令遊戲嘅期待度直線上升啦！
時間設定雖然唔係同最熟悉嘅哈利、衛恩、妙麗做同學，但都可以同學生時期嘅小仙女‧東施、比爾‧衛斯理一齊上堂！
至於玩家角色方面，正如消息所講，玩家並唔係要扮演故事入面任何一個已經存在嘅人物，而係要自行創建一個新角色，展開自己嘅校園生活，所以開始時需要自訂外表形象，甚至連自己嘅宿舍都可以自由安排家具擺位。
全校學生聚集喺擺滿標誌式長枱嘅大廳，粉絲們最期待嘅開學禮一樣有加入遊戲世界。作為新生，第一件事當然係戴上分類帽被分派去所屬學院！唔好係史萊哲林⋯⋯唔好係史萊哲林⋯⋯
無論係入到咩學院都好，記住要識吓朋友，唔好得罪老師，因為你同其他角色嘅互動會間接影響任務難易度，影響到容後故事發展，所以都要盡量Nice啲，唔好周圍聊交打喇！
小編是認真的！因為遊戲入面真係有得聊交打（笑）當然你都可以做人氣王喺交誼廳開握手會～
除咗認識一班老友，當然仲要喺城堡內周圍探險啦！遊戲畫面見到城堡內環境跟足原著，自由度大。不過霍格華茲咁多秘密，如果身處險境的話，平時學習到嘅咒語就可以幫你脫險，所以玩之餘唔好唔記得努力讀書呀！
有熟悉嘅環境，仲有一班德高望重嘅老師。鄧不利多、麥教授、石內卜、海格、弗利維教授、芽菜教授等都會登場。連海格隻狗狗，未長大嘅牙牙都會出現呀！
最令人感動嘅係鄧不利多、麥教授同弗利維教授都邀請到電影版演員配音！極有親切感，所有回憶都返哂嚟呀！好想比麥教授瘋狂訓話！
遊戲開發商強調《Harry Potter: Hogwarts Mystery》係一個以霍格華茲為背景，希望同學可以係城堡內探險同時，創造到自己喺魔法世界嘅一套故事嘅遊戲，所以玩家唔需要迫自己跟隨原作角色嘅腳步，以自己嘅風格去探索霍格華茲同魔法世界啦！
