明太子係日本博多嘅名產，係將鱈魚卵用鹽同埋辣椒醬醃製而成嘅食品，鹹香帶微辣，非常適合餸飯佐酒。喺日本，就算係普通超級市場，都會好容易買到新鮮嘅明太子，價錢唔貴，對日本人來講係日常食材，就算出面餐廳食唔到，想自己煮都好易。喺香港就比較難搵啲，要去中高檔百貨公司超市先可以買到。返到嚟香港，小編繼續努力尋找食到好味明太子料理嘅地方，而最近小編終於搵到啦！

鱈卵屋，一聽個名就知呢間餐廳係專食明太子㗎啦！由日本福岡引入，喺台灣同香港都有分店，經營理念係希望將日本其中一樣代表性食材——明太子帶到全世界，由中華風嘅點心、炒飯，去到洋食嘅意粉、Pizza等，鱈卵屋提供各式各樣菜式，滿足一眾明太子迷！今日小編就為大家推介返幾款必食之選～

覺得係出面食得唔夠，想將明太子帶返屋企早午晚餐都撈飯？鱈卵屋仲有枝裝明太子醬出售。牙膏狀擠擠裝非常方便，隨時隨地都有得食

店鋪面積唔算大，建議要預先Book定位，鱈卵屋耐唔耐仲會推宵夜定食套餐或者其他任飲Campaign，各位明太子迷立即行動啦！