創意就快可以成為日本人嘅代名詞，每年都有超多新奇又有趣嘅食品推出市面，估你唔到嘅食材一拍即合，變成好食嘅新品，銷量好固然係理所當然嘅事。但你又有冇諗過，而家連以難食聞名嘅產品都竟然賣斷市，震驚1億日本國民？

章魚燒味糖

無錯無錯！今次震驚日本人嘅主角就佢啦！大阪人嘅靈魂——章魚燒，加上零食元素，變成章魚燒糖！？

結合日式章魚燒同西洋菓子嘅精粹，由創立接近70年嘅老牌大阪土產店「長寿堂恵佳」製造嘅章魚燒味糖。據聞食品商喺11月嘅時候以半信半疑嘅心態進行小量生產，心諗：「咁嘅嘢真係會賣得出咩？」點知一開始就喺大阪難波地區、道頓堀嘅鋪頭大賣，而佢大賣嘅主要原因，係因為：佢真係好難食！

食過嘅人對章魚燒糖有以下評價：一放入口章魚燒嘅味道就喺嘴裡面廣散，緊隨其後糖嘅甜味隨即湧上，好難食呀！但係，好有趣呀！不知不覺間就成粒食哂。

章魚燒糖價錢唔算貴，216円一盒有8粒，生產商話好多係觀光客購買。佢個包裝上面都有自嘲一吓，寫住「令我們驕傲嘅味道」。唔算貴，玩味又濃，行過日本買嚟整估吓朋友做手信都唔錯呀！