古語有云：Fashion嘅嘢，你識條_咩？
冇錯！近呢十年，時裝界流行嘅Trend越嚟越令人模不著頭腦。前幾年有Lady Gaga嘅鮮肉裝，後來又有對摺你腳掌咁制嘅高踭鞋（其實戈對可唔可以叫鞋？），仲有透明牛仔褲等，令人一度質疑自己嘅審美觀係咪真係同世界頂尖差咁遠⋯
對於以下呢個item，如果你覺得佢係醜嘅，恭喜你！因為你審美眼光冇錯，今年春夏時裝週，個個都爭住認醜，今年正正就係流行「醜」呢個元素！靚鞋？已經Out咗啦！
Balenciaga x Crocs Platform Clogs
上年10月，Balenciaga 已經披露喺2018年巴黎時裝週會同Crocs合作推出新鞋。Balenciaga不嬲都係走開型格路線，相反Crocs就係大家口中唔係太美觀嘅鱷魚鞋，勝在夠透氣通風，落雨著又真係幾好洗好用嘅！
不過實用還實用，對於兩個Style極唔同嘅品牌突然之間話搞Crossover，好多人嘅反應都係「吓⋯」，甚至有人話究竟呢兩個牌子合作係咪正確，不過正正因為咁，令到產品期待度爆錶！其實Crocs同其他高檔時裝品牌合作已經唔係新鮮事，上年佢同Christopher Kane推出嘅產品亦成功殺入時裝週，先睇睇上年嘅Crossover先啦～
以為醜就冇市場？早前LV、Celine等超級名牌出嘅鞋雖然比外界話好醜，但就掀起一陣ugly shoes熱潮，徹底顛覆成個時裝界！所以之前一話有Balenciaga x Crocs厚底鞋嘅Online Pre-Order，產品已經直接Sold out！價錢都要US$850，不愧係出現喺巴黎時裝週舞台嘅單品呀！
今次可以Pre-order嘅分別有Pink同Toast兩種顏色，鞋面裝飾一如普通Crocs可以自己Customise，至於School Bus Yellow 同Avocado Green暫時就只係喺時裝週Runway出現過。
至於可以襯咩衫、咩場合著 ，小編⋯真係唔知道⋯不過有高級時裝雜誌就透露遲啲仲有正式發售期，大家仲有機會可以買到，有創意又自覺Carry得到嘅你記住緊貼留意住最新消息啦～
