海洋公園喺嚟緊幾年將會有水上樂園同兩間新酒店陸續落成。最快登場嘅係會喺今年6月正式開幕嘅香港海洋公園萬豪酒店。早前佢嘅官方網站已經開放咗啦！雖然仲未有得訂房，不過就有好多酒店嘅模擬圖片同設施簡介，大家可以先睹為快！

香港海洋公園萬豪酒店

萬豪酒店不嬲係連鎖式經營，不過入到嚟海洋公園，都會跟返樂園主題嘅！作為高級酒店，梗係要有返個戶外大泳池，同時設有兒童遊樂區，以礁湖作為主題，喺中庭位置被三座酒店主樓圍住，客房望園景泳池又靚啲，住客行落去又就腳！

酒店Lobby一樣好有睇頭，一行入去就見到16米高圓柱水族箱，貫通幾個樓層，會落到去連接多功能宴會廳外面嘅空間，就算唔入住酒店，淨係嚟參與活動都夠哂氣派。

酒店設有少見嘅無柱式大型宴會廳，大約可以開到80席，無論係擺酒定搞舞會地方都夠大。

酒店主樓高8層，有450間普通客房同21間特別套房，以家庭客戶為主，房間主題會包括海洋世界、熱帶雨林同奇趣動物等，仲有海洋公園嘜頭威威司令公仔陪你渡假～預計客房平均價錢要$1500左右。

餐飲方面，酒店設有一間中菜館、一間西式扒房、一間國際餐飲Cafe同一間以酒吧娛樂消遣，全部都標榜可持續餐飲，好貼合樂園本身嘅教育意味！

其他設施仲包括會議室、健身室等。至於海洋公園第二間新酒店就預計會喺2020年第二季落成，大家仲要等吓啦！

如果想知道最新訂房消息就記得捕實以下官網啦！

香港海洋公園萬豪酒店官網：
http://www.marriott.com/-hotels/travel/hkgop-hong-kong-ocean-park-marriott-hotel/