荷李活影后級人馬Jennifer Lawrence除咗演技精湛之外，最受人喜愛嘅原因就係佢傻大姐又超級率直嘅性格。冇錯！最緊要係夠真！喺娛樂圈呢個花花世界有幾多人可以喺紅咗之後仍然保留一份自我？2010年22歲已經攞到奧斯卡最佳女主角，係史上第二年輕嘅得獎者，身價升到圈內頭幾位，無損佢繼續我行我素，而且每次都以超霸氣方法秒拆關公災難！最近佢嘅新戲《紅雀特工》上映，連同奧斯卡頒獎禮同一系列宣傳同清談節目，由朝跑通告跑到晚都咪話唔辛苦！就係因為咁，呢個傻大姐繼2013、14連續兩年喺頒獎禮仆親之後，又鬧出一堆笑料～

雖然醉心演戲，不過Jennifer Lawrence向來都唔太憻長面對傳媒，行紅地毯面對一堆例牌問題，問你今日套衫有咩特別，答完一次又一次，JL都曾經表示頂唔順，所以今次佢就決定一邊飲酒一邊行紅地毯～

不過就係因為咁令佢飲多咗，處於興奮狀態，以為自己開緊Party，喺現場周圍Yo人玩，淨係睇相都知道佢當日有幾Hyper（笑）

聊完梅莉·史翠普傾計，又去同好姊妹Emma Stone擺搞怪Pose合照，頒獎禮上仲見到佢篤對方面豬登，真性情出哂嚟，真係好可愛～

女漢子果然係女漢子，著住Dior晚裝裙，捧住天后身份，想去後排都係就咁跨過去，又開心到大動作跳住舞，呢啲大咧咧得嚟又唔討人厭、可愛到帶比身邊嘅人好多歡樂嘅行為應該都只係得JL先Carry到～

天后級人馬當然有佢專業嘅一面，早上時間跑完兩場清談節目，顧及節目效果需要喺鏡頭前飲酒，不過夜晚又要出席自己新戲首映禮，節目完咗已經Wing Wing地，所以狂飲齋啡提神，結果就令到一堆化學物質喺身體入面打交⋯⋯

之後JL喺The Ellen Show就表示自己當時都心知不妙，所以搏命擘大雙眼，說服自己同人們：我好清醒，我冇醉！結果就變咗呢個死魚眼表情。喺節目入面佢自己都忍唔住話呢個經歷真係慘不忍睹，自己都頂唔順恥笑自己！

早前佢為咗宣傳新戲，喺只有攝氏4度氣溫下，著住性感夜裝裙喺天台接受訪問，結果受到女權組織大力評擊。其實有留意JL新聞嘅朋友都知道佢不嬲都大力支持女權運動，唔認同女性過度瘦身或者克制。而佢都親自反擊外界評論，喺Fb貼文指自己喺外面影相只係影咗5分鐘，就算落緊大雪，佢都一樣會企出去，呢個係佢嘅選擇，都係佢嘅專業。喺幕前都可以用真摯言論霸氣回應不公道嘅言論，不愧為深得人心嘅天后！