寶寶很苦，但寶寶不說⋯⋯平時返工返學對住無良Freerider、廢柴上司、刻薄老細⋯⋯嗚呀～我漿爆喺呢一個Moment要爆喇！今晚！就今晚！我要約班Friend出嚟吐苦水！返屋企處理完國家大事，宵夜時段出嚟搵個地方一路食嘢一路吹水。串燒份量小小就啱哂喇！星期五晚，睇定以下呢間小店，嚟個Happy Friday聲討大會吧！
紅磡 美味佳
呢間喺紅磡近黃埔嘅串燒店CP值極高！多款串燒價錢都不過係$15以下，價錢平但味道一啲都唔差，因此吸引好多Poly學生同街訪落嚟食，仲起咗個朵比佢叫「肥婆雞」，係唔少人嘅集體回憶～
鋪面唔算太細，大概有50個座位，座位都算闊落唔太迫，小編多次試過閒日夜晚11點左右去到，座位依然有8-9成滿，就算外賣都要排隊，可想言之有幾受歡迎！
用剔紙仔方式落單，價錢一目了然，姐姐會係食物嚟齊後再去你張枱Confirm一次睇下有冇漏單。飲品就可以自己去雪櫃拎，賣單時再計數，夠哂清楚！不過小店未有酒牌，如果想飲啤酒嘅話就可以去鄰近便利店買，入去一路食一路飲！
如果係當正餐怕唔飽，呢度除咗串燒之外，仲有車仔麵，大碗抵食。不過想攝取碳水化合物充飢，就一定要叫呢度嘅蛋炒腸粉，外皮煎得脆香，內裡軟腍，加埋芝麻醬、甜醬味道一流，份量亦都唔少，如果想試埋其他串燒就要3個人Share啦！
食串燒不忘食菜，呢度嘅燒韮菜超級大串，擺滿一個碟，燒得香口但唔會太乾，菜嫩無渣，$8一串極抵食！
翠肉瓜先烚熟再燒香，唔會比爐火蒸乾水分縮水，厚切大塊入面仲好Juicy～
粟米一份有兩小舊，份量足一條，兩個人食叫一份啱啱好。
燒茄子同樣係大碟，多肉而且燒得夠腍身，調味唔會過鹹，非常不錯！
招牌燒雞全翼（又名肥婆雞翼）$10／串，$26／3串，原隻上大隻多肉，皮脆孜然味香，唔怪得係呢度嘅必食之選！
大部份肉類同丸類都已經用蜜糖、孜然粉調好味。不過咪住咪住！呢度仲有一樣秘密武器，好多人都滄海遺珠。望吓枱面上嘅小鐵罌，就係佢喇！
呢個沙嗲汁先係真正嘅隱世美食，花生、沙茶、同沙嗲香極濃，淋上肉類同丸類將佢地提升到去無敵嘅層次，尤其係加落花枝丸同豬頸肉上面，一秒將佢變成九龍城泰國風味，而且係無限添加，啱哂同小編一樣重口味嘅朋友呀！
日晝工作厭力已經好大，到咗夜晚同一班朋友嚟到地踎小店，喺呢度無需要裝模作樣討好任何人，吔串墨丸大數呢個世界嘅不公，聽日瞓醒又係一條好漢，繼續作戰，呢個就係生活（含淚）
美味佳
地址：紅磡寶其利街2號地舖
