「食材嘅精華全部去哂個湯度！」呢句說話真係一啲都無講錯。喺香港大家打邊爐總係忍唔住要飲兩啖湯；日本拉麵嘅湯底就更加唔洗講；至於韓國，你會諗起牛骨湯？人蔘雞湯？嗯～小編諗起嘅係街邊車仔檔戈杯熱辣辣嘅魚糕湯！喺韓國有賣魚糕嘅地方，都幾乎附有免費嘅魚糕湯，仲要係無限量供應。雖然唔係用啲特別珍貴嘅食材煲出嚟，但係戈種魚糕味精嘅感覺真係令人欲罷不能！

係就係廉價食品，不過最慘嘅係就算你有錢，都未必可以隨時食到呢下先揼心口！不過有咗佢，唔洗飛韓國，安坐家中都可以飲到魚糕湯喇～

韓國即沖魚糕湯包

有韓國食品公司推出咗「Omuk Tea」（ 어묵 티），即係魚糕湯味嘅即沖飲品，推出之後喺韓國SNS引來極大討論，大家都紛紛話「正！」，連韓國本土都被搶購到成日冇貨呀！

Jaws Omuk Tea一盒有12包，獨立包裝，即沖魚糕湯茶包每個重5g, 放喺185ml熱水浸2-3分鐘就可以飲用，可以依照喜好自己加減水量調節濃度。

喺香港足不出戶都可以享受到韓國街頭風味，凍冰冰沖返杯暖吓手暖吓胃真係世界級享受！

一盒12包，售價係5900韓元，大約40令蚊港紙，價錢合理。小編見到香港有網站可以代購，價錢就貴小小，大約70-80蚊港紙，有興趣嘅讀者記住參考返喇！