Starbucks常客，下次去上海嘅時候唔好唔記得要去全球最大Starbucks「臻選咖啡烘焙工坊」朝聖！上海開幕嘅臻選咖啡烘焙工坊佔地30000平方呎，比另外一間位於Starbucks發源地美國西雅圖嘅焙焗工坊大一倍，真真正正係咖啡迷嘅主題樂園。

除咗一般星巴克飲品等產品之外，臻選咖啡烘焙工坊最吸引人嘅一定係店內咖啡豆生產線，由焙焗、儲存、包裝到運送至工坊各處，就好似咖啡豆嘅過山車一樣，睇住已經覺得好刺激！

臻選咖啡烘焙工坊除咗提供數款全新口味咖啡之外，亦設有中國第一間Starbucks Teavana分區，可以品嘗不含咖啡因嘅各式花草茶；臻選咖啡烘焙工坊甚至為你準備各款紅酒及啤酒，為你帶嚟不一樣嘅Starbucks體驗。決定咗要飲咩之後，你仲可以去配對吧台，Starbucks工作人員將會為你推薦同你杯咖啡最夾嘅食品，喺臻選咖啡烘焙工坊度過最美味嘅時光。

跟住落嚟，Starbucks仲打算喺米蘭、紐約、東京以及芝加哥四個主要城市開設烘焙工坊，預定於2018至2019年間陸續開幕。唔知Starbucks會唔會打算係香港都開番間呢？