去到日本，唔單止時尚服飾、潮物玩具，就連甜品市場都係一個大戰場！而近年喺眾多甜品之中突圍而出嘅就係各式各樣嘅Pancake啦！當中嘅熱店主打嘅Pancake都有分幾個種類，一齊嚟睇下有邊幾間可以喺花多眼亂嘅夢幻甜品之都殺出一條血路啦～
Eggs’n Things
Eggs’n Things係1974喺夏威夷以食到「All Day Breakfast」為概念創立嘅老牌餐廳。全部食物都好有外國特色：大大份，包你食到飽！明亮開放式嘅環境讓你一邊歎住早餐，一邊感受島國風情，全日都咁Cheerful！而其中最signature嘅食物就係佢嘅Pancake啦！佢可以話係掀起日本Pancake熱潮嘅元祖店，初時登陸日本只有原宿總店，當時每日都要排個半鐘頭以上先有得食，隨住生意越嚟越好，分店都越越多，而家仲有得網上預約，唔洗再排大隊，準時到就有得食啦～
Eggs’n Things最突出嘅地方就係佢完全唔吝嗇Cream，擠到成座山咁高，仲有唔同口味嘅糖漿比你任落。一碟有5塊Pancake，美式扁型，Cream多，食到尾都唔會怕太乾，甜度啱啱好，一啲都唔漏，女仔一個人都食得哂！
同行朋友唔好甜食點算好？唔緊要！呢度仲有其他類型嘅早餐選擇，Egg Benedict同樣出色，食完鹹嘅再食甜又得～
原宿分店地址：東京都渋谷区神宮前4-30-2
JR「原宿駅」表参道口徒歩6分、
地下鉄「明治神宮前駅」5番出口徒歩2分
地下鉄「表参道駅」A2出口徒歩6分
訂位連結：https://www.eggsnthingsjapan.com/reservation
FLIPPER’S
FLIPPER’S被譽為奇蹟Pancake，2016年喺東京文青區下北澤創立總店，一年內開咗4間分店，今年仲登陸香港，Pancake迷去銅鑼灣都可以食到啦！奇蹟Pancake呢個名源自佢超軟綿食感，製作都有非常嚴格嘅過程，即叫即整，確保蛋白內面嘅空氣唔會因為放太耐而留失，煎Pan會用紅用線儀器探溫，件件出品都有品質保證。
呢樣嘅Pancake相信大家都唔陌生，質地極鬆軟腍身，唔洗用叉都好易分開，輕盈到好似食緊梳乎厘，建議先食一啖品嘗Pancake自己蛋香，再沾特製嘅牛油楓糖忌廉一齊食，忌廉好重牛油，配埋Pancake，相重滋味。
部份分店仲有可以外賣嘅Pancake Pie，酥皮上下層夾住原味楓糖吉士醬，當然唔少得主角Pancake，脆軟交集感覺令人難以抵抗，配杯黑啡為一日嚟個滿足嘅開始，夠哂醒神！唔同分店間中仲有推出其他口味，經過記住要望望啦～
自由之丘分店地址：東京都目黒區自由之丘1-8-7 3F
網址： http://flippers-pancake.jp/
星乃珈琲店
以為大型集團連鎖店就一定冇好嘢？呢套諗法喺日本就唔啱用喇！星乃珈琲店係小有喺關東起家嘅復古Cafe，同之前介紹兩間明亮又有朝氣嘅Pancake店唔同，呢度嘅裝修以深色木為主，歐美風格，環境燈光較暗，極有古典氣息，適合放慢腳步坐低喺度歇一歇，睇下書，Hea返一個下晝。
雖然呢間餐廳以咖啡起家，但佢嘅Pancake一樣好得！佢唔係扁平形狀，亦都唔係梳乎質地，而係偏向似蛋糕嘅厚實口感，主要係淋上楓糖漿，味道剛好, 甜而不膩。
星乃珈琲店仲供應其他輕食同埋套餐，部份時段仲會附送招牌咖啡，分店夠哂多，總有一間喺左近，又唔洗隊長龍，行街行到攰入去食個Pancake抖一抖再戰，過下文青生活都幾正㗎～
為大家介紹咗3間口感唔同嘅Pancake店，去日本記住去試下啦～
