過埋新年就踏入狗年啦，好多商場都會以狗狗做主題，朗豪坊今年就帶埋嚟自日本嘅《忠犬麻糬柴犬》嚟到旺角陪你迎春接福！

朗豪坊《忠犬麻糬柴犬》春日祭

今個新年朗豪坊帶咗8隻肥嘟嘟嘅麻糬飯團柴犬，降落商場4樓通天廣場，由即日至到2月28日坐定定同你開春日祭賣萌拜年！當然唔少得影靚相打卡位，仲有一系列互動遊戲，仲可以憑住高分數換領麻糬柴犬限量毛公仔！？即刻睇住路線圖玩盡春日祭啦～

4大互動遊戲

「彩蝶遊樂園」

幸福當然要自己親手捉住啦！看守米鋪嘅黑色柴犬GOMA（芝麻）長駐「彩蝶遊樂園」陪住你用紙扇親手捉住象徵幸運嘅福蝶，希望大家撲過福蝶，狗年轉走霉氣，行個好運！

即日喺場內消費滿$500就可以獲得遊戲卡一張，可以參與遊戲一次。玩法十足祭典入面嘅撈金魚小檔，成個場面好有日本氣氛呀～

「心心相印」

喺場內指定參觀指定攤位，影相分享至社交媒體，就可以獲得《忠犬麻糬柴犬》賀年卡一張。再嚟到「心心相印」攤位，印上四隻米鋪柴犬嘅印章，就可以DIY屬於自己獨一無二嘅賀年卡送比摯愛！

米鋪守護犬： OKAKA（小鰹）、TUNA（吞拿）、GOMA（芝麻）同UME（小梅）都會化身成賀年印章，等你集齊將4隻肥柴帶返屋企，新一年豐衣足食～

「AR汪星神社」

新年梗係要去求籤祈個福啦！嚟到神社企喺AR鏡頭面前，4隻後輩柴犬：KINAKIO（小粉）、MONAKO（小餅）、SAKURA（小櫻）同ANKO（豆沙）為你預測新一年各方面運程，即場Scan埋QR Code仲可以返屋企慢慢研究𠻹～

「柴犬大滿足」

四隻喺米鋪長大嘅肥仔柴犬最鐘意就係食飯！嚟到「柴犬大滿足」，你嘅任務就係要將幾隻為食柴柴餵飽飽！自問係遊戲高手嘅你要出擊啦，只要喺商場內消費滿$500後領取遊戲卡，參加「柴犬大滿足」同「彩蝶遊樂園」遊戲各一次，分數達到一定數目嘅話就可以獲得《忠犬麻糬柴犬》限量版毛公仔，千祈唔好錯過帶佢地返屋企嘅機會呀！

靚相位：「柴犬舍」

臨走前記得嚟「柴犬舍」同一班老友Selfie，記低呢個齊人時刻，新一年繼續團團圓圓、事事順利！

即日起至2月15日喺場內消費滿一定金額仲可以免費換領「周年旺相．汪星報喜」利是封一套6個，數量有限，換完即止。活動其他細節同詳程大家記住留返場內宣傳海報同單張啦～

快啲嚟朗豪坊同柴柴歡度新年啦～