「你聽到春天的腳步嗎？」冇錯！日日廿幾度，春夏季已經嚟到啦！著背心短袖可以降降溫，不過最爽都係吹住晚風，咕嚕咕嚕大啖啜返罐啤酒，打個大嗝～係咪好有日劇《螢之光》嘅畫面呢？

想做日劇女主角就梗係要飲日本啤酒啦！夏天將至，為大家介紹返一個日本啤酒廠牌：北海道網走Beer，佢出品嘅啤酒顏色超䚍，最特別就係連藍色啤酒都有！味道同視覺都帶俾你前所未有嘅冰涼感！

北海道網走ビール：流氷DRAFT

由北海道網走地ビール啤酒品牌釀製嘅流氷ドラフト（流氷DRAFT）係上個月推出嘅新品，亦都係本文嘅主角！海藍顏色來自藻類天然色素，以北海道緯度高嘅地理位置優勢，採用鄂霍次克海溶冰釀製，視覺同味覺都夠哂Fresh！

有齊樽裝同罐裝，酒精濃度5%，入口質感清爽，少一份辛口啤酒嘅苦澀，味道較甜似汽水，易入口啱哂女仔～

櫻花啤酒：桜エール

網走Beer出品嘅櫻花啤酒（桜エール）係春季限定商品，淡粉紅色加埋櫻花香味，成個春天嘅味道喺口腔內大爆發！

大自然綠色清香：知床ドラフト （知床Draft）

產品描述話要將世界遺產：知床嘅大自然味道傳達比大家！聞落富有植物香，味道帶草青味又唔太似綠茶，感覺新穎，真係幾有大自然嘅感覺呀～

櫻桃味啤酒：桜桃の雫

呢款正呀！選用網走地區最上盛嘅櫻桃作為原料，櫻桃香氣同味道都非常強烈濃郁，飲落清甜爽口，加埋咁夢幻嘅顏色，真係攻陷唔少女仔心！

網走ビール呢個廠牌屬於北海區北端網走市嘅地區啤酒廠，就算喺日本其他地區都唔係咁容易買到，係網走市自家出品嘅名物，就係因為咁所以好多日本人去到旅行都會買嚟飲吓。唔知會唔會因為多咗人認識，遲啲香港都有得飲呢？