《哈利波特》本傳系列已經完結一段時間，陸續有其他後作、前傳、外傳推出，嚟緊仲有《怪獸與他們的產地 2》電影上映，將哈利波特熱潮長久延續落去。粉絲去主題樂園就係想親身感受吓巫師世界嘅魔幻之處！喺《哈利波特》發源地：英國，有間上年年尾先開幕嘅酒吧可以比你扮吓石內卜調製魔藥，酒吧Booking長期都幾Full，一齊睇吓有幾巴閉啦！

倫敦巫師主題酒吧：The Cauldron

哈利就最唔擅長石內卜教嘅魔藥學，The Cauldron就係以魔藥學作為重心主題，遊客嚟到其實係上魔藥學課程。唔只係齋坐聽書，係要落手做Practical 㗎！入店第一件事：著返件長袍、攞返自己枝魔杖先，然後就可以去到店內唔同嘅Station，聽Professor講解，學點樣調製各類型藥水。好！上堂先！

調製魔藥整個過程需要學生照住Notes將各種材料切片、 磨碎、同混合，當中會出現變色、泡沫爆發、甚至噴煙！有時Professor仲會表演噴火，最勁仲會小型爆炸，乖學生仲係初階班就千祈咪亂試喇！玩還玩，都請你用心學習，因為無論成功定失敗，完成之後你都要自己飲咗佢！

大家見到都大叫Magic，其實酒吧嘅老闆係讀Programming同Design出身，本身係科幻小說同電影迷，一直希望將入面嘅情節實體化。於是醉心鑽研分子混合學，以科學知識諗出各種令人大叫Amazing嘅Cocktail沖調方法，再用自己嘅本行去Design成間酒吧嘅概念、裝修，用具、Marketing手法，好多工作都一手一腳自己搞掂，擺好多心機㗎！

除咗Cocktail之外，酒吧仲同手工啤酒廠合作，供應埋啤酒；仲有可以加錢買到63種唔同嘅魔杖，全部由人手製造，要經過好多重試驗先做到最後成品，一啲都唔馬虎！

酒吧入場門票係 £29.99，可以體驗1小時45分鐘嘅魔藥學雞尾酒課程，包一杯手工啤酒同兩杯由你自己選擇同親手調製嘅Cocktail。所有魔藥學課程必需預約，喺官方網站見到Booking都幾Full，開業反應非錯唔錯！

注意：千祈唔好比啲麻瓜們亂入呀！

官方網站預約：https://thecauldron.io/
地址：The Cauldron, 5d Stoke Newington Rd, Stoke Newington, London N16 8BH, UK