宮崎駿嘅御用音樂家 久石讓事隔7年再度訪港辦演奏會，原定5月4日、5月5日夜晚8：00、5月6日下午3：00開Show嘅場次已經喺2月1日早上10時公開發售。
3場嘅門票10分鐘內一掃而空，入面有多少係真樂迷，多少係黃牛黨大家心中有數！原價$1080嘅門票被炒至近萬蚊，主辦單位 港樂亦都已經報警處理，不過仍然難以平息樂迷怨聲，港樂同久石讓相討後，5決定加開最後一場，而且係實！名！抽！籤！入！場！制！
推實名抽籤入場制：加開5月5日下午3點場
實在太令人感動！港樂強調今次加開嘅場次有8成門票將會公開發售，其餘就會留比贊助商同合作機構，而購票安排會由港樂及城市售票網授權購票通處理。重點係：今次採用嘅抽籤制唔需要大家「霸頭位」搶飛，每人只可以登記一次，如果真係，真係，真係，「中咗獎」，張飛上面仲會印上你全名，經核對先可以入場。嗯！係我㗎喇！今次係我㗎喇！
詳細流程
申請抽籤日期
話明係抽籤，今次唔洗爭喇！由3月26日朝早10：00起至4月2日晚上11：59期間，樂迷可以上購票通網站登記抽籤，登記人最多可以抽兩張門票，而過程中必需提供本人及同行人士身份證上嘅英文全名，全名會印到門票上作入場核對之用。如果發現有重複登記，會以最後一次嘅登記資料作準，之前嘅將會作廢，所以話今次真係人人機會均等！完成程序後就會收到確認電郵同參考編號。
公佈抽籤
我最期待的畫面：抽籤結果 將會係4月9日朝早10：00喺購票通網站以參考編號公佈，中籤者都會收到電郵通知，座位次序會以中籤先後次序分配。
中籤後之付款及購票程序
中籤者必需於4月12至18日期間，帶同身份證明文件於指定時段親臨四個城市售票網售票處付款，每張門票會收取額外$35手續費。為咗保障自己，離開前記住核對返門票上嘅全名是否正確呀！
候補購票
如果4月9日冇收到電郵通知，請你唔好放棄住！若中籤者冇喺4月12至18日期間付款同取票、或者出現退票情況，咁機會就可能會降落到你身上啦！候補中籤者將會收到電郵通知，於4月24至30日期間去到指定城市售票網售票處付款及取票。所以未到最後一刻都唔好灰住，最緊要係：Check Email ！
對名入場 Enjoy the Show!
呢個時候，各位中籤者需要嘅係清淨你嘅雜念，準備比久石讓嘅音樂洗滌你嘅心靈。仲有一樣嘢都好緊要，就係開心過中獎嘅你都要最少提早1小時30分鐘帶同用作登記嘅身份證明文件到達會場，為保障你嘅利益，工作人員會核對你嘅全名，如果持票人唔能夠喺開場前完成身份核實程序，就要等到中場休息之後先可以入場㗎喇！
《久石讓音樂會》詳程
場次：5月4日（星期五）8：00pm／5月5日（星期六）8：00pm／5月6日（星期日）3：00pm
加場（實名抽籤入場制）：5月5日（星期六）3：00pm
地點：香港文化中心音樂廳
抽籤連結：http://msg.cityline.com/joe.htm
主辦單位FB專頁：https://www.facebook.com/HKPhil/posts/10155474343906344
最後都要強烈譴責：黃牛可恥！
