對於宅女嚟講，日本動漫其中一樣最令人尖叫嘅情節，就係BL！
2016年，《大叔之愛》以短篇電視劇形式喺深夜時段播放，因為對白同畫面夠哂爆、具話題性而喺網絡爆紅。等咗兩年，今個4月終於正式成為TV Asahi嘅連續劇，逢星期六晚上11點播放，首播日為4月21日，宅女們，尖叫吧！
故事講述已經33歲嘅男主角春田創一雖然喜歡女性，可惜因為完全不受歡迎而搵唔到結婚對象。正當佢不停向上天祈求佢真命天女降臨之際，竟然意外發現佢嘅上司 黒澤武蔵手機Wallpaper係春田創一自己嘅相，之後仲同自己表白！？同一時間，被迫自立而被趕出家門嘅春田創一得到後輩牧凌太收留，可以去佢屋企暫住。咁就出事喇⋯⋯牧凌太竟然又向佢表白！？一段男性間嘅三角戀故事隨即展開！
三大男主角近乎以原班人馬演出，保留田中圭同吉田鋼太郎呢對超有化學作用嘅組合，後輩一角就由原本嘅落合扶樹換成專門演小鮮肉角色嘅林遣都。
有睇過2016年版嘅朋友，春田創一同上司去一齊廁所嘅呢一幕一定好深刻（笑）
工作同私下對住暗戀對象嘅黒澤武蔵部長態度上有好大差別，呢種大叔演繹出嚟嘅反差意外地萌得可愛！
除咗田中圭嘅肌肉係亮點之外，2016年版呢一幕壁咚真係成套劇嘅精粹所在，當中表白嘅對白睇到人面都紅埋：「我知道前輩鍾意巨乳⋯⋯但巨根唔得咩？」呀！！小編不行了～
新版就有後輩濕身壁咚男主角嘅劇照流出，未首播，先興奮！（尖叫中）
劇組為咗宣傳，仲幫黒澤武蔵起咗個IG，叫做「武蔵の部屋」，入面全部都係春田創一日常，仲有跟蹤佢去伊豆旅泉旅行嘅「男朋友視覺」照，形容自己「少女心爆發」，真係幾搞笑！為咗睇田中圭，即時Follow不解釋！
能夠將短篇劇集重製做連續劇版本，前作口碑肯定非常不錯。將敏感嘅話題搬上電視，編劇一定要有返咁上下功力。田中圭有份出演嘅電視劇全部都有唔錯嘅評價，相信《大叔之愛》都會有一定質素保證，大家要密切留意喇！
