講到新加坡美食，你會諗起咩？肉骨茶？叻沙麵？斑蘭蛋糕？小編最掛住嘅係海南雞飯！尤其係新加坡三大名店之一嘅「天天海南雞飯」，放入口嗰下，真係推倒人類一切對海南雞飯嘅認知，好食到想喊出嚟！不愧為米芝蓮推薦食店，連Gordon Ramsay都要嚟領教呀！
想食到宇宙級海南雞而家唔洗再飛新加坡喇！因為「天天海南雞飯」預計會喺4月上旬登陸香港銅鑼灣Fashion Walk，成為首個成功引入「天天海南雞飯」嘅地方，就算之前錯過咗葵涌嘅限定Pop-up，以後都可以去實體鋪食到喇！
究竟「天天海南雞」有幾巴閉？新加坡店嘅味道又係點？一齊睇吓啦！
新加坡麥士威熟食中心內「天天海南雞飯」
新加坡嘅「天天海南雞飯」位於牛車水，即係當地唐人街附近嘅麥士威熟食市場裡面（Maxwell Food Centre）。新加坡嘅熟食市場多數冇冷氣，要捱吓炎熱天氣，而且係自助式快餐經營，一個托盤自己攞食物自己搵位，Gordon Ramsay連同電視台去採訪嘅時候稱佢為Hawker Food。1987年開業，繁忙時間淨係買隊都要等成個鐘，唔單止係外國人，連當地人都會專程嚟食，真係新加坡嘅國民雞飯！
海南雞嫩 但主角竟然係個油飯！？
點解話「天天海南雞飯」推倒小編對海南雞飯嘅認知呢？一般人大概會覺得海南雞飯應該係無汁，雞肉配油飯，整體係乾身，食嘅時候根據喜好自行沾上酸辣醬、薑蓉等。「天天海南雞飯」嘅海南雞上碟時已經有淋上由豉油、蠔油、雞湯混合而成嘅秘製醬料，香而不鹹不油膩，老闆建議只係點酸辣醬就足夠； 雞肉會經過冷河程序處理，嫩滑呢啲就是基本吧！
而最最最出色就係底層嘅油飯，真係不得了！佢嘅質感比一般食到嘅油飯濕，但絕對係唔係爛，粒粒米都完整分明，軟硬適中。雞湯、雞油同醬料嘅精華非常均勻地滲透每一粒飯芯，全因為煮飯嘅時候定時攪伴，調味亦都恰到好處，隻雞嘅精華落哂喺飯入面，加埋本身米香，淨食油飯都幸福到有啲感動。
30年家族生意 多番改良到最佳味道
1987年，「天天海南雞飯」開業，創立人兩年前見食店漸漸上軌道，決定退休將家族經營嘅老字號交比妹妹，2009年再由佢囡囡接手。兩代人管理30年嘅食店，喺海南雞嘅做法上有唔少改良。起初會將玉雞整熟後塗上麻油保持鮮嫩，而家就改良到先將熟雞浸落冰水30分鐘，令表層Cool Down，入面微暖鎖住肉汁，再吊起晾乾30分鐘，令雞皮乾身變得爽口，上碟前再塗上雞油同少量醬汁，單單係以上煮雞嘅步驟就要用上兩小時，你食緊嘅係啖啖心機！
全球首間分店進駐香港 多得老闆一輪遊說
將「天天海南雞飯」引入香港嘅Charles本身係海南雞Fans，專程去到當地向老闆拜師學藝，經過多番遊說後，終於正式落實開全球首間海外分店，仲會請嚟新加坡總廚主理，所有步驟同秘方都會跟足新加坡店做法。售價方面將會係$70-80，比出面嘅海南雞飯唔係貴太多咋喎！
小編真係好期待可以再次食到嗰種擺啖飯入口都會嘩一聲嘅幸福感覺，希望香港店可以保持到總店嘅水準啦！
