《The Walking Dead》的確係喪屍迷必睇嘅一套長篇電視劇，雖然第9季播放日期仍然未正式落實，不過喺歐洲嘅影迷就真係好彩啦！有英國大型主題樂園公布會喺復活節開放新遊戲設施，就係以《The Walking Dead》做主題嘅過山車！

The Walking Dead: The Ride

英國大型樂園 Thorpe Park 前幾日公布今年主題會定為「Year of The Walking Dead」，喺4月開放首個以電視劇《The Walking Dead》作為背景嘅過山車，呢項設施將會有齊4D元素，絕對唔止係VR咁簡單！而樂園一直都有將機動設施同驚慄元素擺埋一齊，好似拼圖殺人狂嘅 Saw：The Ride同 Derren Brown’s Ghost Train等設施都有唔錯反應，今次新作令人期待指數爆登呀！

官方預告中可以見到扮演喪屍嘅演員需要經過特別甄選，接受演出訓練，化妝、動作姿態亦會跟足電視劇入面嘅設定，最癲嘅係樂園會訓練埋演員做高空安全措施，因為⋯⋯佢地真係要爬到過山車軌道咁高嘅位置，誓要將你嚇餐勁！

樂園指 The Walking Dead: The Ride 嘅設計工作長達一年半，無論係視覺定物理方面都落足心機，特效、燈光、氣味、甚至係觸感都全部有齊，唔怪得要演員們爬到上過山車軌啦！

樂園仲話呢項設施位置嘅附近已經會安排沾滿血嘅喪屍遊走人群中間，連排緊隊或者啱啱喺過山車落嚟、魂魄仲未齊嘅你都唔會放過，令人覺得自己真係入咗Walking Dead嘅世界一樣呀！

由於驚嚇度太高，所以樂園制定要13歲以上先可以使用呢項機動遊戲設施，計劃會去嘅朋友要留意返啦！