呢幾個月對小編嚟講真係好大打擊！先係GD入伍，然後到隊員太陽同大成，仲有鄭容和都要離開我啦嗚嗚嗚⋯⋯

韓國有兵役法規定，所有男性公民30歲前都必需服從國家兵役制度，最高可以服役3年。2017、18年好多當紅男星都相繼入伍，各位Fans有冇掛住佢地？等我地一齊整合吓入伍Oppa們嘅最新近況啦！

BIGBANG G-Dragon

入伍日期：2018年2月27日
預計退役日期：2019年11月26日
所屬部隊：第三步兵師團 白骨部隊

天團BIGBANG隊長GD被派到令人聞風喪膽嘅白骨部隊，駐守南北韓分界線，被譽為韓國戰鬥力第二強嘅部隊，訓練出名艱苦嚴苛，隊員個個出到嚟都變大隻仔。有傳GD第一日入營就因為猜輸包剪揼而要做洗碗兵，但係就同其他呀兵哥相處融洽，仲成日被要求簽名同合照，GD全部親切接受，去到邊都受男女歡迎呀～

不過前幾日又有最新營內相片流出，GD手踭、手臂位置要由三角掛固定，左腳都要帶上護踭，疑似扭傷，搞到好多Fans瘋狂寄信同慰問品到軍營，經理人公司都已經勸Fans停止咁做。相信GD已經得到適當治療，Fans們唔需要過份擔心啦！

BIGBANG 太陽 大成

入伍日期：2018年3月12／13日
預計退役日期：2019年12月11／12日
所屬部隊：第六師團青星部隊／第廿七師團必勝部隊

為咗縮短BIGBANG嘅空白期，未到「大限」嘅太陽同大成都已經報到入伍。太陽特登喺2月3日、服役前一個月娶閔孝琳，世紀婚體無論係人定景都靚到飛起。臨別秋波，太陽都喺IG披露自己剷青平頭裝嘅相，順便幫ELLE影埋封面都仲得，人靚做咩髮型都好睇呢句說話真係講得冇錯！

營中外流照片見到太陽著上迷彩軍服，手持長槍，有哂姿勢！而且有照片都見到太陽同其他呀兵哥搭哂膊頭影相，太陽同大成平時都有做Gym操開肌肉，兩個人性格都好開朗同陽光，相信同人相處同體能方面都冇問題，各位Fans都可以放下心頭大石啦！

BIGBANG T.O.P

入伍日期：2017年2月9日
預計退役日期：2019年6月
所屬部隊：公益兵

本身以義警身份喺去年2月開始服役嘅T.O.P 因為捲入吸毒事件而被革職到外面受審，期間又因為服食過量藥物一度昏迷，最終被判入獄10個月、緩刑2年及罰款。醫院期後證實T.O.P患有重度抑鬱症，需要暫停兵役。

吸毒醜聞本身令到T.O.P 身敗名裂，不過被公開重度抑鬱症病歷之後，唔少網民都「手下留情」，Fans仲喺社交平台留低暖心鼓勵。而T.O.P亦喺今個月重新繼續佢未完成嘅520日兵役，去到社區做公共服務。

早前被影到佢同小朋友一齊整陶瓷，面帶微笑表情仲好溫柔，可能咁嘅環境比起活喺鎂光燈下更加適合Oppa，雖然Fans們都好掛住佢，不過大家比啲空間Oppa休養，希望佢病情好轉，等合適嘅時間再回歸見我地啦～

CNBLUE 鄭容和

入伍日期：2018年3月5日
預計退役日期：2019年11月26日
所屬部隊：第十五師團勝利部隊

之前被揭發走後門、利用特權考慶熙大學博士學位嘅CNBLUE隊長鄭容和因為風波搞到要取消個人巡迴演唱會，不過入伍當日就有大批Fans係軍營前同佢搞暫別見面會，容和Oppa仲好暖心同佢地講要小心身體，要相信佢會好快會返嚟！

容和Oppa所屬嘅係一支陸軍精英部隊，受訓地點係山地地區，環境幾差，可能因為咁令佢睇落去消瘦咗。不過有傳容和入伍一個星期已經因為表現良好獲升做中隊長，Fans們以你為榮呀！

池昌旭

入伍日期：2017年8月14日
預計退役日期：2019年5月13日
所屬部隊：第三步兵師團 白骨部隊

上年後半年入伍嘅池昌旭雖然已經冇再拍電視劇，不過服役已經超過半年嘅佢人氣同存在感好似完全冇減少過！由佢代言產品嘅廣告海報隨處可見，連上個月南韓冬奧都要搵佢做軍隊代表亮相拍宣傳片，以服役中嘅藝人嚟講絕對係一件非常了不起嘅事！

https://www.youtube.com/watch?v=5QQGDiKLwpQ

池昌旭所屬部隊同GD一樣，都係精英中嘅精英：白骨部隊，不過見到相入面嘅昌旭笑到V哂手，相信都應付自如。入伍只係半年，佢表現仲好到做埋助教，有機會訓練GD呀！

金秀賢

入伍日期：2017年10月23日
預計退役日期：2019年7月22日
所屬部隊：現役陸軍

金秀賢行事不嬲都低調，事前要求公司唔好公開自己嘅入伍地點，以免Fans花心機送行。前一日仲輕輕鬆鬆打緊保齡球，只係喺社交平台輕輕的留下一句：多謝大家一直以來支持，我會好好當兵後健康返嚟！希望大家都要健康地生活！然後佢就輕輕的入伍了～

睇完第一張相，小編真係以為係劇照嚟，著上制服真係拍戲一樣。都教授喺作為訓練兵時以高分完成任務，得到「優秀獎」，仲得到特別休假證，相當唔錯！

Oppa，我等著你回來～訓練辛苦了，要健康返嚟啊！Fighting！