放假無論留喺屋企同家人過、定係出去開Party一班朋友圍威喂，只要有部Switch，就一定可以炒熱氣氛，玩足一日都唔會悶場！2017年，淨係一隻《Mario Kart》都已經夠玩到2046。2018年開始3個月，陸續有各種類型遊戲登陸Switch平台，一齊嚟睇吓有咩必玩遊戲要入手啦～
《太鼓之達人》
等到喇⋯⋯經典中嘅經典：《太鼓之達人》終於宣布登陸Switch喇！任天堂官方預告講明會喺今年夏天發行，Single Player模式仲可以攞住兩個手制瘋狂打鼓，分分鐘可以十足街機一樣打到大汗疊細汗～
嚟到Switch平台當然要有返佢嘅賣點，除咗大熱流行曲之外，選曲仲會包括其他遊戲嘅配樂，好似《Super Mario Odyssey》同《Splatoon 2》，當然啦，想Classic啲都可以整返首「夏祭」先～
《任天堂明星大亂鬥》
幾乎所有任天堂發行嘅遊戲平台都會推出《任天堂明星大亂鬥》，等咗咁耐，直至3月9日，任天堂終於喺官方YouTube Channel上載第一條Trailer，暫時見到嘅角色有Splatoon裡面嘅人物，仲有任天堂標誌性嘅Mario，我最期待的畫面終於都出現啦！
話明係Switch版大亂鬥，當然唔小得上年獲得好高評價嘅《薩爾達傳說》、仲有《寵物小精靈》同《星之卡比》等角色，仲可以選擇操控玩家Customize自己肖像嘅Mii，小編好想親自落場砌低超夢夢呀～
《星之卡比：新星同盟》
由任天堂遊戲機陪伴成長嘅朋友一定有玩過《星之卡比》！遊戲好玩在吸入唔同屬性嘅敵人之後可以擁有佢嘅能力同武器。嚟到Switch當然要有更多突破，支援4人Multi-player模式，仲可以結合同伴屬性，合作使用殺傷力更強嘅新招式打敵人，武器變化更多更創新！
而家Demo已經可以免費喺eshop Download，正式推出日期會係3月16日，大家玩住Demo Mark實推出日期啦！
《Overcooked》
想順利地通過《Overcooked》嘅關卡，你需要朋友；但想成功地拆散真摯嘅友情，甚至係愛情，你就需要《Overcooked》！被譽為「分手Game」嘅《Overcooked》實體版喺2月已經開售，最多可以4人合作，喺地獄廚房同時間競賽，除咗煮餸同送餐之外，程序仲包括埋洗碗，甚至係救火，要幾忙有幾忙呀！
去到唔同關卡仲會出現貨車、升降台等移動工作台，如果唔小心隨時會將同伴推落街跌死！想考驗吓你地嘅感情有幾深？不妨玩《Overcooked》試一試佢（笑）
《Splatoon 2》
黑馬遊戲《Splatoon 》當年賣出超過百萬隻，唔止炒價被推高到飛起，仲被認為係救返Wii U銷量嘅功臣，可想而知質素有幾高。遊戲去年7月推出，原理非常簡單，玩家分為兩隊，總之喺限時之內將地圖內噴上自己隊嘅顏色，比例較高一隊會勝出。有多種唔同噴墨武器，仲有合作打三文魚大佬模式，一個大規則都有好多玩法。
支援多人連線對戰，可以喺墨水入面潛行阻擊，仲可以用顏料槍一嘢打爆對手，一班人玩肯定悲鳴聲不斷，又係一個考驗友情同親情嘅遊戲！
《前進！奇諾比奧隊長》
得意嘅肥仔蘑菇Toad啱哂小朋友，版面清楚，用色夠Cute，操作簡單得嚟又要動動腦筋，最多支援兩名玩家，一個係操控蘑菇隊長，另一個就會負責護航隊長，應該唔會玩到反面！預計今年 7 月 13 日正式發售。
消息仲話遊戲將會收錄《Super Mario Odyssey》嘅最新關卡，不過有機會只佔好小部份，大家都係將重點擺返喺Captain Toad 度啦～
《進擊的巨人2》
日漫迷一定識嘅動畫《進擊的巨人》會以第2季動畫作故事背景，中文版3月15日同PSV同日登陸遊戲平台。用機動裝置高速飛行同獵殺巨人嘅遊戲畫面令到粉絲玩家都大叫爽呀！
製作團隊表示會沿用同強化之前大受好評嘅飛行同戰鬥系統，可以供操控嘅角色由前作10個大增至30個，巨人嘅神情動作都有大力改進，預告片中血腥同斷肢畫面質感自然真實，粉絲可以親身體驗殺巨人嘅快感～
《Outlast》
講咗咁多合家歡遊戲，又係時候要滿足返恐怖Game愛好者。《Outlast》第一集同DLC《Outlast：Whistleblower》上星期已經以《Bundle of Terror》為遊戲名，以Package型式喺eshop上架，至於續作《Outlast II》亦都喺同日公布於3月27日推出。
第一集推出嘅時候好評如潮，玩家全程只可以走佬避開精神病院友，Jump Scare加埋配樂同音效非常夠力，連達哥都話玩到失禁！雖然第二集口碑不及第一集，不過Download落Switch夜晚熄哂燈玩都咪話唔驚～
咁多款唔同路線嘅遊戲，你又最想玩邊款呢？玩還玩，最緊要以和為貴呀！
