記唔記得早排美國掀起一陣京都念慈菴搶購熱潮？不論係學術界定娛樂圈，紛紛有人喺社交平台指京都念慈菴川貝枇杷膏效用神奇，長達數個月嘅咳嗽同氣管問題，只要一食京都念慈菴，15分鐘內乜事都冇～連Netflix大熱美劇《Stranger Things》入面飾演神秘實驗室話事人嘅演員Matthew Modine都忍唔住買返樽。

對於香港人嚟講，基本上京都念慈菴真係普通到日用品一樣，求其行入一間藥房都買到，而且都唔係咩新品，好多人細細個就聽過佢個名。不過可能歐美地區唔係咁普及，所以好多人都以為發現新大陸～早喺2014年，Jason Mraz已經講過自己開Show前會用念慈菴沖水飲舒緩喉嚨不適，仲話佢甜甜地，有啲薄荷，覺得幾好味～

隨住越嚟越多外國人認識，產品好自然會融入當地文化，產生更多你飲咗咁多年都冇諗過嘅全新配搭：雞尾酒。

念慈菴爆紅嘅時候正好係年尾年頭嘅交接時期，要慶祝新年，外國人就梗係要飲酒。被炒貴10倍嘅念慈菴成為咗矜貴食材，本身味道甜，質地結身，於是Bartender，甚至係連唐人街嘅餐廳都當咗佢係糖漿用嚟調酒。有試過嘅人就話調出嚟嘅飲品有川貝枇杷嘅香味，帶薄荷又有「中國味」，撞落烈酒好有冰火交融嘅感覺，有創意又意外地Match！

以下係外國餐廳提供嘅京都念慈菴Cocktail食譜，聽聞喺Chinese New Year嘅時候大賣，喺美國就被炒到天價，不過如果你屋企都有一樽嘅話，又不妨自己調製飲吓喎！

念慈菴薑啤

Recipe嚟自唐人街一間餐廳，話佢係Chinese New Year Themed Drink喎～適量念慈菴枇杷蜜放杯底，將薑啤倒喺上面，上面再加上椰子奶蓋，味道應該幾熱帶風情同易入口，女仔啱飲～

 Golden Rooster

呢款Golden Rooster嚟自溫哥華一間酒吧，將Whisky、雪利酒、念慈菴同拖肥蘋果混合，顏色金黃好似火雞一樣，外國人見到都覺得好好意頭，好鐘意呀～

Halk Smash

網絡流傳嘅Hulk Smash可以根劇喜好用Whisky、Brandy、Rum或者Gin，總之就係酒溝京都念慈菴，再加小小青檸汁，屋企有咩酒都用得，又幾容易調～

世界已經冇人可以阻止歐美地區對念慈菴嘅愛戴，唔知嚟緊唐人街會唔會出現念慈菴咕嚕肉、念慈菴雪糕呀咁呢（笑）