《Avengers 3: Infinity War》會喺4月25日於香港區上映，用咗10年時間鋪路嘅劇情終於都要進入白熱化階段！距離上映仲有一個月唔夠，不如一齊溫溫書睇吓幕前幕後消息，準備好心情迎接終極大佬Thanos！

《Avengers 4》為美國隊長Chris Evans於Marvel宇宙之道別作

2011年初次以美國隊長形象現身大銀幕，身型大隻加上青靚白淨，係典型美國人靚仔樣。不過上個月佢就宣佈喺完成《Avengers 4》嘅補拍後就會辭演美國隊長一角，同時正式完成Marvel嘅演出合約。雖然Marvel迷實會好掛住佢，不過Chris Evans就可以繼續擴大戲路，唔需要再被角色定型，有新嘅發展，都係一件好事呀！

今集戰爭圍繞Vision頭上心靈原石

大家都知終極大佬Thanos嘅目的係集齊一套6粒嘅無限原石，而Vision頭上嘅心靈原石就係Thanos嘅目標，預告可以清晰見到Vision被人強行取出原石，神情痛苦。而劇組早前都透露今集將會有復仇者成員犧牲，究竟最後會係點呢？不過飾演Vision嘅演員Paul Bettany反而問咗傳媒一個好耐人尋味嘅問題：「究竟Vision嘅生命係咪要靠佢頭上嘅寶石維持呢⋯⋯」

黑寡婦頭髮唔再係紅色

Black Widow——Natasha Romanoff一路都係紅色頭髮，雖然戲迷都留意到佢每集都有落足心機換髮型（錯重點）今集就直情嚟個大改造，變埋金色頭髮。有漫畫迷就出嚟解話，指Black Widow其實只係一個特工代號，佢嘅訓練組織仲有其他特工，漫畫中新一代黑寡婦叫Yelena Belova，正正係金色頭髮，相信本集髮型係向角色致敬。

Winter Soldier 官方改名為Winter Wolf

美國隊長老友Bucky喺二戰後被蘇聯軍洗腦當做生化武器，只要一有人讀出「咒語」就會失去自主性，變成聽教聽話嘅人型兵器。喺2月上映嘅《黑豹》結尾彩蛋中，就見到Bucky身處瓦干達，黑豹個妹正幫佢療傷，左手被包紮。

近期造型照就可以見到Bucky換上全新亮藍色手臂，上面再冇蘇聯組織標誌，好大機會係由瓦干達嘅汎合金製造，而且以瓦干達科技，好可能可以洗走Bucky被心理控制嘅意識，令佢可以真正加入復仇者成為重要戰力。所以已經重獲新生嘅佢都要洗走舊嘅行動化號，改名做Winter Wolf！

Loki係忠係奸成決定性要素

被稱為謊言之神嘅Loki喺系列中永遠都係最難估計嘅因素，牆頭草作風話咁易就可以扭轉大局。先係復仇者聯盟第一集嘅幕後黑手，到雷神系列第三集，一時背叛一時又出手幫拖。預告入面可以見到Loki將喺阿斯嘉偷嚟嘅空間寶石交出，佢係被迫定係自願呢一點將會成為今集決定成員安危嘅關鍵。

全明星電影未見鷹眼登場

《美國隊長3：英雄內戰》揭露鷹眼原來有老婆仔女一直隱居，佢都明確表示想引退過平凡生活。喺近日刊登嘅海報入面，唔少人都發現不見鷹眼踪影。好彩喺製作名單上都見到佢個名，Marvel表示鷹眼會展開同其他成員不同嘅冒險，唔知佢今次會以咩身份出現呢？

有Fans就覺得好唔服氣，惡搞咗張Poster，大家笑完就算了～

Thanos養女Gamora協助

Gamora係Thanos疼愛嘅養女，不過知道老佢嘅大陰謀之後，決定聯同銀河守護隊一齊協助復仇者對抗老豆，相信兩父女嘅交鋒會成為看點之一。

瓦干達開放後引入Starbucks！？

https://www.youtube.com/watch?v=5iOhzJdDawE

呢個的確只係一個玩笑嚟啫！4月7日發放嘅預告中，準備開戰嘅時候黑豹問侍衛長Okoye：「你覺得開放之後嘅瓦干達會係點？」Okoye答：「有奧運、Starbucks之類？」大家都冇諗過大軍竟然要參戰，保衛我地嘅世界嘅重任要靠你地喇！